Għaliex issa l-abort jista’ jsir xorta waħda? Għaliex min suppost għandu jitkellem qiegħed b’ħalqu magħluq?

Minn Edwin Vassallo

Dawn l-emendi li qed jippreżenta l-gvern ma huma xejn għajr emendi favur l-abort. F’dawn l-aħħar għoxrin sena, l-ebda omm f’pajjiżna ma mietet minħabba komplikazzjoni waqt it-tqala. Dan huwa fatt. F’pajjiżna, it-tobba dejjem ħadu deċiżjonijiet ġusti favur is-saħħa tal-omm u tat-tarbija. Dan ifisser li dawn l-emendi, fejn l-erba’ snin ħabs għall-omm jew t-tabib f’kas ta’ abort, issa qed jitneħħew. Dan ifisser li dawn l-emendi qegħdin isiru biss għal raġuni waħda. Dik hi li meta omm u tabib jaqblu li hemm kas gravi għas-saħħa tal-omm waqt it-tqala, it-tqala tkun tista’ tiġi terminata. Fi kliem ieħor it-tqala tista’ tiġi imwaqqfa u t-tarbija tiġi maqtula fil-ġuf mingħajr ebda konsegwenza penali. Forsi ħafna jgħidu imma x’hemm ħażin li tqala titwaqqaf f’każ ta’ sitwazzjonijiet gravi ta’ saħħa tal-omm?

Il-ħażin qiegħed hawn. Skond dak li qal il-Ministru Chris Fearne, il-kelma “gravi” mhux ser tkun definita jew spjegata. L-interpretazzjoni għal dak li hu gravi qed titħalla miftuħa. Kull ma qed jingħad hu biss li tqala issa tista’ tiġi mwaqqfa f'”sitwazzjoni gravi għal saħħiet l-omm waqt it-tqala“.

X’ifisser dan? Mela dawn l-emendi deħlin biex skont il-gvern tkun tista’ tiġi mħarsa is-saħħa tal-omm f’kas gravi ta’ saħħa. Imma dan mhux ġa kien qed jiġri qabel? Mela għala l-bżonn ta’ dawn l-emendi? Mela dawn ma huma xejn għajr emendi biex issa t-tobba jistgħu jwaqqfu t-tqala bl-iskuża tas-saħħa tal-omm. Kieku ma kienx hekk, dak li huwa gravi kien ikun definit fil-liġi. B’hekk minn issa ‘l quddiem ser ikun deċiż ad hoc, bejn l-omm u t-tabib li tista’ tkun imwaqqfa tqala. Qabel kien jiġri dan, fi kliem ieħor it-tobba kien jikkunsultaw mal-omm u l-familja quddiem fatt gravi ta’ gravidenza. Imma s’issa b’dawn l-emendi qed jinfetaħ il-bieb għall-abbuż. Qabel kien hemm parametri ċari ta’ x’inhu gravi. Illum dawn il-parametri saru offuskati jiġifieri ma għadhomx ċari xejn.

Dan ifisser li l-Gvern ser joħloq eċċezzjoni fil-liġi u jneħħi l-piena ta’ ħabs għal min jista’ jabbuża. Qabel kien hemm dan id-deterrent. Illum dan id-deterrent spiċċa. B’hekk permezz ta’ dawn l-emendi, il-gvern qed jagħti l-opportunita’ lill-omm jew lit-tabib li jistgħu jagħmlu abort anki jekk ma hemmx periklu. Kull ma jridu hu li jaqblu li jeżisti periklu għal saħħiet l-omm u l-abort isir. Għalhekk b’dawn l-emendi, Malta qed iddaħħal l-abort mit-tieqa flok mill-bieb, għaliex issa l-abort jista’ jsir xorta waħda.

B’hekk l-abort ma għadux eċċezzjoni kif kien qabel imma ser isir parti mill-liġijiet ta’ Malta. Skont dawn l-emendi tal-Gvern, issa ser isir legali li tqala tkun terminata. Dan ma hux qed jissejjaħ abort iżda fir-realta’ dan hu abort għaliex xorta waħda tibqa’ proċedura ta’ qtil ta’ tarbija fil-ġuf għaliex issa qed ikun permezz li t-tqala tkun terminata anki jekk fil-verita’ ma hemm l-ebda periklu. Imma jekk it-tabib jiddikkjara li kien hemm periklu għall-omm, dan jittieħed bħala bon fatt.

Għalhekk min jgħid li dawn l-emendi ma humiex abortivi, jew dan mhux qtil ta’ tarbija fil-ġuf huwa diżonest. Min jgħid li dan mhux abort bil-pulit huwa giddieb u qed joskura l-fatti minn kif inhuma.

Anki jekk fi ftit jiem li baqa’ tinstab xi kelma li biha tista’ tkun spjegata xi tfisser “sitwazzjoni gravi għal saħħiet l-omm waqt it-tqala“, xorta waħda dawn l-emendi qed jiftħu beraħ l-opportunita’ li biha omm li tkun tixtieq twaqqaf it-tqala, tista’ ssib tabib li jkun lest li jgħid li żviluppat sitwazzjoni gravi waqt it-tqala tal-omm, u jittermina din l-istess tqala.

Il-fatt li quddiem dak kollu li tkellem dwaru l-Prim Ministru fl-intervista ma’ the Times of Malta, u dak kollu li qalu l-ministri waqt il-konferenza stampa, ħadd mill-awtoritajiet ma’ tkellem juri l-istat li fih jinsab dan il-pajjiż. L-awtoritajiet li suppost għandhom jitkellmu mhux qed jitkellmu bl-iskuża li għad jridu jaraw l-emendi miktuba. Dan ifisser li f’pajjiżna għandna awtoritajiet li ċedew id-dmir li jitkellmu favur il-valur tal-ħajja.

B’hekk l-awtoritajiet qed juru li għadhom qed jaraw fejn sejra l-opinjoni pubblika minflok qegħdin imexxuha. Waqt li l-gvern qed imexxi l-opinjoni pubblika, dawn l-awtoritajiet qed jaraw fejn sejjer is- sentiment imma mhux kapaċi imexxuh għaliex mhux kapaċi jgħidu li dak li qed jisimgħu huwa moralment ħażin.

Bl-emendi legali, il-Gvern irid jgħid ‘l għaliex skond hu, il-qtil ta’ tarbija fil-ġuf issa ser jkun qiegħed isir bl-iskuża legali u aċċettabbli għall-liġi u għall-mediċina.

Almenu għal dawk it-tobba li ser ikunu lesti jagħmlu l-abort, għandhom issa l-iskuża biex jagħmluh waqt li jgħidu li mhux qed jagħmlu l-abort. Din hija l-ikbar daħqa. Li l-awtoritajiet li għandhom jitkellmu mhux jitkellmu. Din hija l-ikbar diżonesta li qed issir f’wiċċ il-poplu Malti. Min suppost mhux qed jaqbel ma’ dawn l-emendi imma qiegħed jipprova jsib skuża biex jibqa’ sieket huwa kompliċi fi qtil ta’ trabi innoċenti fil-ġuf.