Bernard Grech ma jagħtix il-pożizzjoni tiegħu fuq l-emendi li bihom l-abort ser jiddaħħal f’pajjiżna

Minn osservatur politiku

Għada t-Tnejn, il-Parlament mistenni jitressqu emendi li jittrattaw it-terminazzjoni tat-tqala meta saħħet il-mara tkun fil-periklu. Permezz ta’ dawn l-emendi tabib ikun jista’ b’mod legali jittermina tqala, meta din issir ta’ periklu għall-omm.

Skond il-gazzetta l-Illum, Bernard Grech baqa’ ma tax il-pożizzjoni tiegħu fuq dawn l-emendi għalkemm fadal biss ftit siegħat biex jitressqu. Bernard Grech qed iżomm lura milli jagħti l-opinjoni tiegħu għax jaf li jekk jitkellem kmieni, jew jitkellem minn rajh, jista’ jagħmel żball kbir.

Issa diġa’ għandna konferma ta’ dawn l-iżbalji meta nafu li fin-nomina tal-eks-Prim Imħallef, hu kien ippronunzja ruħu u qal iva għall-pożizzjoni ta’ kummissarju, imma meta ddiskuta mal-grupp parlamentari qalulu mod ieħor.

Jista’ jkun ukoll, li qed jibża’ jieħu pożizzjoni minħabba l-grupp ta’ Repubblika. Dak li jista’ jingħad li r-Repubblichini huma maqsuma bejnithom fuq l-abort. Mela minflok jieħu din l-okkazzjoni biex forsi jsaħħaħ ftit idejh, anki fil-konfront tar-Repubblichini, qed jurihom li baqa’ l-kelb fidil meta mhux qed jgħid x’irid jagħmel. Imma jekk Bernard Grech jaħseb li bil-pożizzjoni li qed jieħu ser jintgħoġob ma’ xi parti qed jgħarralu. La qed jintgħoġob ma’ dawk li huma favur l-abort u l-anqas ma dawk li huma kontra.

Dak li wieħed jista’ jikkonkludi li meta Bernard Grech ma weġibx għall-mistoqsijiet tal-gazzetta Illum dwar l-emendi fuq l-abort, jidher ċar li għad ma għandux l-ordnijiet ċari minn min qed verament imexxi l-Partit Nazzjonalista bħalissa għaliex il-PN maqsum fuq din il-ħaġa. Minflok użaha biex isaħħaħ idejh, ħa pożizzjoni li kompliet turi kemm hu dgħajjef Bernard Grech bħala mexxej politiku.

Fuq kollox, Bernard Grech għandu l-istatut tal-PN favurih jekk irid jieħu pożizzjoni kontra l-abort. Imma lanqas kien f’pożizzjoni jirrispondi meta ġie mistoqsi dwar l-istatut tal-Partit li jgħid għal darbtejn li l-Partit Nazzjonalista huwa kontra l-abort f’kull ċirkustanza. U toħroġ il-għaġeb, lanqas kien f’pożizzjoni li jgħid jekk iltaqax mal-grupp parlamentari jew għandux skedata xi laqgħa mal-istess grupp biex jiġu diskussi dawn l-emendi sensittivi. Jidher ċar li r-raġel ma tantx hu konvint mill-pożizzjoni li jkun kontra l-abort. Hu dan kien ġie ppreżentat mill-media tal-arċisqof Scicluna bħala l-persuna tal-knisja, il-bniedem tal-moviment ta’ Ta’ Kana!

U jekk għandu pożizzjoni Bernard Grech qed jibża’ jagħmilha pubblika għax jaf li l-kelma tiegħu ma fihiex saħħa u tista’ tinqaleb faċilment mill-kurrenti li qed jirrenjaw bħalissa fil-Partit Nazzjonalista. Jew inkellha għaliex illum, Bernard Grech irid partit liberali favur l-abort. B’hekk in-naħa l-oħra ndunaw b’din id-dgħufija u qed jitfgħu l-melħ fuq il-ferita’.

Mingħajr ebda dubju dawn l-emendi jirrikjedu diskussjoni b’saħħitha u hu mistenni li jkun hemm opinjonijiet differenti. Bil-fors irridu niftakru li l-Partit Nazzjonalista huwa l-uniku partit li jiddikjara fl-istatut tiegħu li huwa kontra l-abort fuq prinċipji.