Għala Bernard Grech, il-PN u r-Repubblichini ma semmew xejn dwar il-konnessjonijiet ta’ Joseph Muscat mal-kuntrattur Michael Stivala?

Il-Ħadd li għadda, The Sunday Times tatna storja dwar kuntrattur u l-konnessjonijiet tiegħu ma’ Joseph Muscat. Din l-istorja ġiet ippubblikata lejlet li Bernard Grech għamel ir-risposta tiegħu għall-baġit tal-Gvern.

Dak li laqatni kien il-fatt li l-Kap tal-Oppożizzjoni Nazzjonalista, Bernard Grech ma għamilx referenza għal dan il-kuntrattur bħala tweġiba għad-diskors tiegħu għall-baġit li ppreżenta l-Ministru tal-Finanzi. F’din it-tweġiba, jien kont qed nistenna lil Bernard Grech jgħid xi ħaġa dwar l-istorja li kixfet s-Sunday Times dwar ix-xogħol ta’ konsulenza li ġie mogħti l-eks-Prim Ministru Joseph Muscat minn ċertu kuntrattur Michael Stivala.  Dan hu wieħed mid-developers ewlenin imma li ismu ftit li xejn jissemma’ fl-aħbarijiet meta mqabbel ma’ Joseph Portelli ta’ Għawdex.

Jien kont nistenna li Bernard Grech jidħol fis-sustanza ta’ din l-istorja li s-Sunday Times ppubblikat lejlet id-diskors tiegħu bħala tweġiba għad-diskors tal-baġit. Imma bqajt b’xiber imnieħer. L-anqas kien hemm xi follow up fil-jiem li għaddew mill-media tal-Partit Nazzjonalista. Din id-darba, l-anqas ir-Repubblichini ma ndenjaw jorganizzaw xi protesta. L-anqas Matthew Carauna Galizia ma ndenja jonorana b’xi tweet biex jgħidilna kemm hu korrott Stivala għaliex ħeqq min jagħmilha ma’ politiċi korrotti hu korrott!

Min-naħa tiegħi, jien mhux ser nidħol fis-sustanza ta’ din l-istorja. Imma meta tara li l-kap tal-Oppożizzjoni, ir-Repubblichini u l-anqas il-media tal-PN ma tgħid xejn dwar din l-istorja jibda jiġik is-suspett li dan Stivala hu qrib ukoll il-Partit Nazzjonalista.  

Ġa hemm għejdut li Joseph Portelli huwa qrib il-PN, kif hemm l-għajdut li hu qrib il-Partit Laburista.  Jekk toħroġ xi storja li Portelli hu qrib il-Lejber jew li hu frontman ta’ xi politiċi tal-gvern mhux ser tkun kbira għaliex tkun mistennija.

Imma fil-każ ta’ Stivala, fil-kuruturi tal-Partit Nazzjonalista ma jitkellmux b’għajdut. Fil-każ ta’ Stivala, fil-kurutur tal-kwartieri tal-PN jitkellmu bil-fatti.  Ħafna qed jistaqsu għala l-PN mhux jattakka lil Stivala? Hemm min qed jistaqsi wkoll jekk il-PN mhux qed jattakka lil Stivala għaliex dan hu mħallat mad-deputat Nazzjonalista Ryan Callus?  Wieħed irid jiftakar li l-mara ta’ Callus, Maria, kunjom xbubitha hu Stivala. Minħabba f’hekk, jien bagħat mistoqsijiet lil Ryan Callus fejn staqsejtu jekk l-kuntrattur Stivala jiġix mill-mara tiegħu. Fuq kollox, staqsejt lil Ryan Callus jekk qattx Stivala kellu kuntatt miegħu. Il-kommunikazzjoni li bagħtlu hija din:

Nixtieq nagħmillek mistoqsija relatata mal-istorja li ġiet ippubblikata mis-Sunday Times l-Ħadd li għadda dwar l-imprenditur jew kostruttur Stivala.

Tikkonferma li dan jiġi mill-mara tiegħek?

Fi kliem iehor tikkonferma li dan hu pparentat mal-mara tiegħek?

It-tieni tikkonferma li inti tafu personalment?

Sallum jien għadni bla tweġiba.

Wieħed irid jiftakar li l-istess Ryan Callus kien impjegat tal-MEPA.  L-istess Callus serva fuq bordijiet tal-MEPA f’isem l-oppożizzjoni u aktar tard kien fuq il-bord tal-Awtorita’ tal-Artijiet.

Immaġinaw li kieku kien hemm xi parentela bejn Adrian Delia u Michael Stivala, kieku r-Repubblichini ġa ħarġu jipprotestaw fit-toroq, l-arċisqof Scicluna ġa onorana b’xi tweet ta’ kundanna u Jacob Borg ta’ The Times ġa ta s-sinjal lil sħabu biex tinbeda kruċjata qaddisa kontra Adrian Delia fil-mainstream media kollha biex jgħidulna li Joseph Muscat u Adrian Delia huma xriek flimkien u b’hekk jitolbu għar-reżenja tiegħu mill-parlament!