Meta r-reġina talbet lill-orkestra tal-yacht irjali biex idoqq il-kanżunetta ta’ Mary Spiteri, Little Child

Illum ser ikun hemm il-funeral tar-Reġina Elizabetta II. Il-media fl-Ingiletterra qed tagħti l-ħin kollu aħbarijiet dwarha u tfakkar il-memorja tagħha. Waħda mill-media li kienet qed titkellem dwarha lbieraħ kienet GB News.

F’mument minnhom, waqt il-programm tal-bieraħ filgħaxija, ġie intervistat Jim Rider li kien il-music director fuq ir-royal yacht – Brittania. Il-preżentatur speċifikament staqsih dwar storja li kienet tittratta r-royal yacht, ir-reġina u Malta.

Fl-1992, Malta kienet marret tajjeb ħafna fl-Eurovision song festival. Il-festival kien sar f’Malmo, Sweden fid-9 ta’ Mejju 1992. Il-festival kien intrebaħ mill-Irlanda. L-Ingilterra kienet ġiet it-tieni u Malta ġiet it-tielet bil-kanżunetta ta’ Mary Spiteri, Little Child.

Ġara li meta sar il-festival ħabat fiż-żmien taż-żjara tar-reġina ġewwa Malta. Ftit jiem wara l-festival, ir-reġina kienet Ġilbilta’ fit-triq lejn Malta fuq il-yacht irjali. Lejliet li l-yacht irjali kien dieħel f’Malta, jiġifieri fis-27 ta’ Mejju, ir-reġina uriet ix-xewqa li tindaqq din il-każunetta ta’ Mary Spiteri waqt li l-yacht ikun dieħel fil-Port il-Kbir. B’hekk hija ċemplet lil Rider, li kif spjegajt kien id-direttur mużikali. Meta ċemplitlu, huwa nżerta kien fuq il-bridge jieħu kafe’ ma xi ħbieb.

Jidher li r-reġina ma kienetx segwiet il-festival imma l-fatt li l-kanżunetta Maltija ta’ Mary Spiteri kienet marret tajjeb kien qajjem kommossjoni u b’hekk in-nies baqgħu jitkellmu dwarha. F’dan il-festival kien qajjem ukoll kommossjoni anki minħabba l-fatt kif tellgħu l-punti u finalment kienet rebħet l-Irlanda u l-Ingilterra kienet ġiet it-tieni.

Ġara li l-anqas Rider ma kien sema’ l-Eurovision. Li kieku kien semgħu, kien ikollu idea tat-tune tal-kanżunetta ta’ Mary Spiteri u kien malajr jirriproduċih. Infatti fil-konverżazzjoni li kellu fuq it-telefon mar-reġina, hu staqsieha jekk semgħethiex id-diska ta’ Mary Spitieri. Hija qaltlu le. Hu rrisponda li l-anqas hu. B’hekk jidher ċar li r-reġina kienet semgħet dwar din il-kanżunetta u waqt li kienet fi triqtha lejn Malta, xtaqet tismagħha waqt li l-yacht ikun dieħel fil-Port il-Kbir. Imma x-xewqa tar-reġina kienet xewqa li trid tiġi mwettqa’.

Filgħodu, Rider ċempel lill-ambaxxatur biex jagħtih it-tune. B’hekk kellu idea ta’ kif kien it-tune u l-orkestra setgħet iddoqqu.

B’hekk meta l-yacht irjali daħal Malta, l-orkestra fuq il-yacht irjali setgħet idoqq il-mużika tal-kanżunetta ta’ Mary Spiteri Little Child kif xtaqet ir-Reġina!