Gvern li jitkellem waħdu biex jaħbi l-islowdown kbir li hemm bħalissa fl-operat taċ-ċivil

Minn osservatur mid-Dar Ċentrali

Dan huwa Gvern li jitgħaxxaq jitkellem waħdu. Qabel il-budget jibda jipprogramma lin-nies biex jaħsbu u jemmnu li dak li qed jgħid huwa, huwa l-verita filwaqt li jkun kuntrarju tal-verita’. Din hija issa l-funzjoni li qed tieħu l-MCESD. Saret pjattaforma fejn il-ministru tal-finanzi jgħid x’ser jagħmel – qiesu xi diskors mit-tron – aktar milli diskors biex jinstiga diskussjoni miftuħa.

U x’qal il-ministru fid-diskors tiegħu? Qal li l-gvern ser joffri ċertezza. Jidher ċar li l-ministru qed jitkellem hekk għaliex fil-pajjiż qed tikber l-inċertezza ekonomika.

L-impressjoni li qed jipprova jagħti l-gvern hija dik li meta jitkellem hu, iridek temmnu għaliex jitkellem waħdu. U meta titkellem waħdek tista’ tgħid li trid.

Fil-verita’ ma hemm l-ebda leħen ieħor li llum jista’ jmeriħ lil dan il-gvern. Iżda hemm il-fatti jwerżqu waħidhom u li juru li dak li qed jgħid huwa biss kisja zebgħa bil-ġir li mal-ewwel xita, jitlaq kollox.

Għalissa li jiswa’ għal dan il-gvern li kulħadd jemmen dak kollu li qed jgħid hu.

Imma kollox mibni fuq bżieżaq tas-sapun. U dan qiegħed jinħass sew tant li hemm slow down kbira fl-operazzjoni jew kif jaħdem iċ-ċivil. U dan ma jirriflettix tajjeb fuq il-ħidma tal-gvern. U issa dan qiegħed anki jidher fil-pubbliku fejn ħafna kapijiet taċ-ċivil mhux qed jattendu funzjonijiet uffiċjali tal-gvern li fihom ikun hemm il-preżenza tal-Prim Ministru. Dan deher sew fiċ-ċelebrazzjonijiet tat-8 ta’ Settembru, li hija waħda mill-festi Nazzjonali u b’hekk il-Gvern joħroġ inviti uffiċjali lin-nies taċ-ċivil tiegħu. Din qed titqies bħala passive resistance li qed issir bħalissa fi ħdan l-istess operat tal-gvern minħabba l-iskuntentizza kbira li teżisti.