Minn wara l-elezzjoni, il-flus saru problema għal dan il-gvern

Minn osservatur politiku

Sa ftit qabel l-elezzjoni li għaddiet il-flus ma kienux problema għall-Gvern. Kien qed jonfoq bl-addoċċ. Kuljum konna nisimgħu bi flejjes li intefqu fuq xi okkażżjoni jew oħra. Money – no problem kienet il-mantra tal-Gvern sa Marzu li għadda.

Imma issa l-folja inqalbet. Issa għaddejjin minn żmien fejn ser ikollna nissikkaw iċ-ċintorin. Id-defiċit refa’ rasu għal-livelli allarmanti u saħansitra anke l-Ministri tal-Gvern, speċjalment il-Ministru tal-Finanzi, qed iħoss li jrid jagħmel xi ħaġa għax il-kaxxa ta’ Malta ser tinfaqa’ jekk mhux diġa nfaqgħet. Issa ndunaw li l-finanzi u l-flejjes fl-idejn saru limitatissimi.

L-ekonomija, għalkemm qed ikollna ħafna ftaħir li qiegħda tirpilja tajjeb, ma hix sejra tajjeb daqs kemm wieħed kien qed jantiċipa jew jistenna. Fil-budget li għadda ma kellniex dawn il-previżżjonijiet u minħabba f’hekk issa l-Ministru tal-Finanzi jrid inaqqas l-infiq akkost ta’ kollox. Fil-fatt il-Ministri kollha ġew ordnati biex inaqqsu in-nefqa tagħhom b’200 miljun euro.

L-isfortuna hija li dan it-tnaqqis veru beda, imma beda minn settur li kulħadd kien qed jistenna li ma jintmessx. Laqgħat mill-ewwel l-edukazzjoni. S’issa nafu biss li l-Universita’ ta’ Malta tnaqqsilha l-budget tagħha b’1.2 miljun euro.

Imma possibbli minn daqstant setturi kien hemm għalfejn jintmess is-suttur edukattiv? Jaf il-Ministru tal-Finanzi li dan huwa l-pedament ta’ kull attivita li ssir fil-pajjiż? Jaf il-Ministru li fl-Universita’ ta’ Malta jiżviluppaw l-aktar imħuħ li pajjiżna għandu bżonn? Jaf il-Ministru li l-edukazzjoni toħloq l-akbar investiment, dak li jolqot direttament l-imħuħ taż-żgħażagħ tagħna li fuqhom irid jinbena l-pajjiż? Jaf il-Ministru li laqgħat settur li fuqu jrid jinbena l-futur tal-pajjiż?

Kuljum qed joħorġu fl-aħbarijiet nazzjonali li kienu u għadhom ħerġin direct orders galor. Dawn jammuntaw għal miljuni. Ħafna drabi dawn imorru għand il-ħbieb tal-partit fil-gvern jew għand ħbieb tal-ħbieb tal-istess partit. Saret ħaġa komuni li l-ministri ma jagħmlux distinzjoni bejn il-Gvern li huma obbligati jmexxu mingħajr ma jħarsu lejn wiċċ ħadd, u l-partit Laburista.

Saret għaddejja mantra fil-pajjiż li kull ministru jiġi jaqa’ u jqum minn kull diċenza u jagħmel dak li jrid u dak li jfettillu. Kollha kemm huma qed jiġu jitmellħu minn kulħadd u ma jagħtu każ ta’ xejn. U biex inkunu nafu bihom dawn il-ħniżrijiet kollha trid tkun hemm xi waħda mid-djar tal-aħbarijiet li tikxef dawn l-maniġġi. Bħala eżempju ħaj nistgħu nsemmu dak li ħareġ fl-aħħar siegħat fejn il-poplu sar jaf li kien hemm kuntratti oxxeni bejn il-Gvern u ex Ministru tal-Gvern tal-Labour li ġġarantixxa minn flus il-poplu mijiet ta’ miljuni ta’ euro fl-electrogas. Jekk mhix korruzzjoni din ma nafx kif tista’ tkun il-korruzzjoni jew direct order!!!