Claudette Buttigieg bidlet il-fehma tagħha dwar xandir ta’ videos ta’ politiċi marbuta ma’ “private events”

Minn osservatur politiku

Imma x’wiċċ irid ikollok! Claudette Buttigieg ħarġet tiddefenti u tappoġġja lill-Prim Ministru ta’ Finland li sfat vittma ta’ attakki wara li video privat li fih kienet qed tirrilassa f’party spiċċa dar id-dinja kollha. Il-Prim Ministru kellha wkoll tagħmel testijiet tossoloġiċi biex tipprova li ma kinitx taħt l-influenza ta’ xi droga. U Claudette Buttigieg għandha l-ardir li toħroġ tiddefendieha u tgħid li dan kien video privat u l-problema tinsab kif video privat spiċċa pubbliku.

Il-problema hawn mhux li Buttigieg qed tiddefendi lil Marin fuq video privat imma d-double standards ta’ din il-politiku mara. Imma possibbli ma tiftakarx meta hi kienet waħda minn dawk li ħammġu lill-kap tagħhom kull meta kellhom l-opportunita’? Din id-deputat taħseb li xi ħadd se jinsa x’għamlet hi u sħaba meta ħammġu kemm felħu lil Dr Adrian Delia?

Ma aħna ser ninsew qatt meta xxandru videos fuq Dr Delia biex joskurawh. Żgur li ser niftakru li anke Dr Delia kien fil-kenn ta’ daru meta xxandru ċertu videos. Trid ma nafx xi tkun biex tkun insejt x’għamilt int ma’ politiku ieħor bħalek f’pajjiżek stess.

Dan ma aħniex qed nitkellmu fuq xi politiku barrani bħal ma hu l-każ tal-Prim Ministru Filandiż, imma kien każ tal-kap tagħha stess ġo Malta. Allura issa ħasset il-ħtieġa li tiddefendi politiku barrani meta kienet hi u sħaba li ferħu meta kien hemm tixrid ta’ videos fuq il-Kap tagħhom. Verament l-ipokreżija ta’ ċertu politiċi ma għandhiex limitu.