Bernard Grech jarmi lil Joe Giglio

Mill-gol caravan fejn qiegħed, Bernard Grech ħareġ stqarrija biex jgħid li ma jaqbilx ma’ Joe Giglio f’dak li qal dwar l-azzjonijiet li jridu jittieħdu rigward is-sitwazzjoni tal-emigranti f’Malta.

Ħa ngħidha kif inhi. Jien kont wieħed li ma qbilx għal kollox ma’ dak li qal Joe Giglio. Jien ma qbilx li s-suldati għandhom jibdew jagħmlu x-xogħol tal-pulizija u jitniżżlu fit-toroq. Jekk hemm problema, il-problema tissolva billi jissaħħu r-risorsi tal-pulizija u mhux jitniżżlu s-suldati fit-toroq.

Imma jidher li Bernard Grech mhux ma’ dan ma qabilx. Ma qabilx ma’ dak li qal Joe Giglio li jekk immigrant jinstab ħati li għamel reat, dan għandu jitkeċċa mill-pajjiż. Fi kliem ieħor, Giglio insista għal aktar dixxiplina u aktar tkeċċija ta’ nies illegali minn Malta. Dan hu argument li jorbot fis-sens li jien naqbel mal-punt li ġa qiegħed jitħaddem mill-qrati tagħna li jekk immigrant jinsab ħati ta’ reati gravi jitkeċċa mill-gżira. Ġa kellna l-każ ta’ emigrant li ġie mkeċċi u wara li tkeċċa wettaq delitt ġewwa l-Italja. Jiġifieri tkeċċija jista’ jkollha ġustifikazzjoni jekk ovvjament ikun hemm raġuni valida warajhata’ tkeċċija.

Dan wassal biex skont The Times, Bernard Grech “jarmi r-retorika kontra l-għarib, wara li l-partit talab għad-deportazzjoni tagħhom”.

U l-punt qiegħed hawn. Kien il-Partit Nazzjonalista li talab biex jitkeċċew għorib jew kif ngħidulhom illum il-barranin. Mela qatt partit jista’ jitlob xi ħaġa bħal din bla mal-kap ikun jaf jew qabel magħha?

Għalhekk dak li ma nistax nifhem kif Bernard Grech ħareġ jattakka lil Joe Giglio. Infakkar li Giglio ħareġ din l-istqarrija f’isem il-Partit Nazzjonalista. Mela, wieħed jifhem li l-kap tal-Partit, Bernard Grech, endorsjaha biex ħarġet. Kieku ma kienx jaqbel magħha, ma kienetx toħroġ mill-ewwel.

Imma fil-verita’, illum hemm kap assenti li bħalissa qiegħed fuq mawra ta’ xahar, idur bil-caravan, ġewwa l-Ewropa. Kieku kien kap serju, kieku kien japprofitta min-nuqqas ta’ preżenza tal-prim ministru ħalli jżid l-attakk politiku. Ara x’għamel il-Prim Ministru? Kulħadd jaf li joħrog bil-yacht. Imma ra li minn żmien għal żmien jiġi lura biex juri l-preżenza tiegħu hawn.

Din l-assenza qed twassal biex:

joħorġu stqarrijiet li l-kap ma jkunx jaqbel magħhom u b’hekk ħarġu minn wara dahru imma għax ta’ Repubblika ma jaqblux, ikollu jieħu azzjoni u jgħid li ma jaqbilx ma’ dawn l-istqarrijiet, b’hekk jikxef in-nuqqas ta’ koordinament li hemm fil-Partit Nazzjonalista.

jew agħar

kien jaqbel magħhom imma għax ta’ Repubblika ma’ jaqblux, għamel u-turn oħra mill-ħafna li qed jagħmel u ma ddejjaqx jarmi lil Joe Giglio.

Hu fatt magħruf li ta’ Repubblika lil Joe Giglio ma jriduhx. Meta darba kont ktibt fuq dan il-punt, Joe Giglio mar jiġri jikteb fuq Facebook u qal li din hija fantasija tiegħi u fake news.

Verament l-istorja hija għalliema ta’ kulħadd.