Stqarrija ta’ Adrian Delia biex jirribatti dak li qal il-Ministru Aaron Farrugia dwar it-traffiku u l-festi ma ġietx imxandra minn Net News

Adrian Delia ħass li kellu juża l-Facebook page tiegħu biex jippubblika r-reazzjoni tiegħu għal dak li qal il-Ministru Aaron Farrugia dwar it-traffiku. Farrugia waħħal fil-festi u li dawn qed jikkagunaw it-traffiku. Delia ddefenda lil dawk kollha involuti fil-festi. Imma għal xi raġuni li jaf biss il-Partit Nazzjonalista, din l-istqarrija ta’ Adrian Delia ma ġietx irrappurtata minn Net News.

Delia kiteb hekk:

“Iktar kmieni matul il-ġurnata bħala kelliem għat-Trasport, Mobilita, Avvjazzjoni u Proġett Kapitali ħriġt Stqarrija biex nirribatti dak li qal il-Ministru Aaron Farrugia u dan flimkien mal-kollega Onor. JulieZahra.mt

Peress li għalkemm fil-bullettin tan-NET News it-trasport, traffiku u t-toroq kienu fil-punti ewlenin u ġie rappurtat x’qal il-Ministru, l-ex Prim ministru Alfred Sant u l-President tal-Malta Hotels and Restaurants Association imma sfortunatament ma ġietx rappurtata l-istqarrija tiegħi, qiegħed nippubblikha hawnhekk għall-konsum tagħkom.

L-istqarrija ta’ Adrian Delia hija din

Iċ-ċittadini jixirqilhom aktar u aħjar

Iċ-ċittadini tagħna jixirqilhom aktar u aħjar. Għax jekk hawn xi ħaġa li kulħadd fehma waħda dwarha hi l-istat diżastruż tat-toroq tagħna.

It-traffiku laħaq livelli ta’ gridlock kważi kuljum, filwaqt li l-manutenzjoni u l-għeluq tar-rotot qed isiru mingħajr ħsieb jew pjan, fost telqa ġenerali li lanqas taraha f’pajjiżi tat-tielet dinja.

Barra minhekk, l-infurzar sar ineżistenti, fejn kulħadd jagħmel fattih mingħajr konsegwenza daqslikieku qegħdin f’xi ġungla u l-proġetti qed jispiċċaw mitluqin u oħrajn weqfin.

Il-Partit Nazzjonalista jesprimi tħassib ukoll għall-fatt li l-prattiċi tajbin ta’ xogħol ma għadhomx jeżistu umbagħad issib scooters mitluqin kull fejn issuq jew timxi, b’periklu għas-sewwieqa u n-nies mexjin, Maltin u barranin.

Iżda quddiem dan il-falliment kollu, il-Ministru Aaron Farrugia qal biss li hu tort tal-Festi. Dan ifisser li, wara sentejn ta’ pandemija f’nofs l-istaġun tal-Festi, il-Gvern qed jitfa’ dell ikrah fuq il-Festi u qed jhedded li jwaqqafhom jew irażżanhom.

Min-naħa l-oħra, il-Partit Nazzjonalista jfaħħar l-impenn tal-organizzaturi u ta’ dawk kollha involuti fil-Festi, li jimxu mar-regoli u jaraw li kollox ikun skont il-Liġi biex dawn ikunu jistgħu jsiru u jitgawdew fl-irħula u l-bliet tagħna.

Il-Festi huma parti mill-identità Maltija u għalhekk, il-Gvern ma jistax jarahom ta’ xkiel jew iwaħħal fihom li l-kaos fit-toroq hu kkawżat mill-ftit toroq li jkunu magħluqin għal ftit ħin bil-permessi meħtieġa.

Il-Gvern qata’ qalbu u m’għandux soluzzjoni, la fl-immedjat u lanqas pjan fit-tul. U ta’ dan kollu, iċ-ċittadin qed jitħalla jbati l-konsegwenzi ta’ kuljum.

Adrian Delia

Kelliem għat-Trasport, il-Mobbiltà u l-Proġetti Kapitali

Julie Zahra

Kelliem għall-Kultura, l-Arti u l-Wirt Nazzjonali

03.08.2022