Kriżi tal-PN f’Għawdex

Minn qarrej ta’ dan il-blog.

Fi żmien Eddie Fenech Adami, u qablu fi żmien Giorgio Borg Olivier, Għawdex kienet fortizza Nazzjonalista. Taħt Lawrence Gonzi, il-PN beda jitlef gelgul ta’ voti fil-gżira Għawdxija u mill-2013 ‘l hawn il-Labour ħa over għal kollox. Illum il-PN f’Ghawdex sfaxxa.

Taħt Bernard Grech, il-PN f’Għawdex krolla totalment. Eluf ta’ Nazzjonalisti Għawdxin telqu lill-partit. Uħud minnhom ma jivvutawx u ħafna oħrajn qed jivvutaw Labour. Miż-żewġ deputati Għawdxin huwa biss Alex Borg li għaddej bil-ħidma – anke jekk Bernard Grech u dak li fadal mill-magna tal-PN, lil Borg warrbuh ghal kollox. Kemm ilu li ħa pożizzjoni ta’ prinċipju fuq il-vot tal-IVF, il-PN tawh il-ġenb lil Alex Borg. Imma Borg qed jibqa’ jisfidhom, u b’aktar minn 6,000 vot warajh lil Borg mhux se jirnexxilhom jeqirduh.

Chris Said issa tilef kull interess. Kien wieħed mill-prinċipjanti fit-tneħħiija ta’ Adrian Delia minn kap tal-PN u biex Bernard Grech tpoġġa kap pupazz tal-klikka. Iżda issa Bernard Grech warrbu wkoll lil Said u dan tilef kull interess. Meta Said ħareġ għall-kariga ta’ kap tal-PN, Simon Busuttil la ried lilu u lanqas lil Adrian Delia. Kien ħadem għal Alex Perici Calascione. Iżda meta Perici Calascione ma għaddiex għat-tieni fażi tal-votazzjoni, Busuttil kellu jappoġġja lil Said biex żgur ma jappoġġjax lil Adrian Delia. Illum Said kisiriha wkoll mal-fazzjoni ta’ Busuttil.

Bħal ma seħħ f’Malta, il-PN f’Għawdex ma ħax ħsieb lin-nies tiegħu. Simon Busuttil kien wettaq suwiċidju politiku għall-PN meta ġiegħel lil Giovanna Debono tirriżenja, biex imbagħad il-Qorti tat raġun lil żewġha. Debono kienet pilastru ewlieni tal-PN f’Għawdex. Kienu jivvutawlha anke Laburisti. Imma Simon Busuttil qatlilha l-karriera politika. L-istess kif għamlu lit-tfal ta’ Anton Tabone, l-ewwel ministru ta’ Għawdex. Meta wieħed minn uliedu pprova jagħmel pass fil-politika, il-PN qatagħlu saqajh mill-ewwel.

L-istess għamlu lill-avukat Samwel Azzopardi, li kien sindku Nazzjonalista tar-Rabat Għawdex. Il-Partit Nazzjonalista ta’ Simon Busuttil tah il-genb u l-istess għamel Bernard Grech biex Azzopardi spiċċa telaq ukoll mill-PN.

Kien hemm ukoll Ryan Mercieca Cefai. Kien ħadem ħafna f’Għawdex bħala kandidat u kien jipprometti. Iżda l-klikka li ħakmet u fgat il-PN qaċtitlu rasu. Bernard Grech lil Mercieca Cefai ramieh ukoll.

L-istess kienu għamlu lill-avukat Joseph Attard tax-Xagħra. Kien avukat jipprometti, ġej minn familja Nazzjonalista magħrufa fix-Xagħra bħala ‘Tal-Qaddis’. Rawh jipprometti u minflok indukrawh, il-PN taħt Simon Busuttil tah il-ġenb u mbuttaw lil Kevin Cutajar mix-Xaghra stess li, fl-aħħar elezzjoni ġenerali tilef postu mill-Parlament. Illum kemm Attard kif ukoll Cutajar żarmaw mill-PN.

Kandidati oħrajn li waqqfu jimmilitaw fil-PN hemm Maria Portelli tar-Rabat. Kienet tfajla tirsisti ghall-PN. Tawha l-ġenb ukoll.

David Stellini bilkemm laħaq poġġa fuq is-siggu tal-parlament li ma telaqx lura lejn Brussell.

Marthese Portelli, deputat Għawdxija, żarmat mill-PN ukoll. Lil din lanqas ma ħallewha taħdem.

Anke sindki Nazzjonalisti spiċċaw irriżenjaw u telqu mill-PN, fosthom is-Sindku Nazzjonalista tal-Għasri li mar indipendenti, l-avukat Daniel Attard. Il-PN warrab ukoll lis-Sindku Nazzjonalista tal-Għarb David Apap.

F’Għawdex Bernard Grech mhux milqugħ. In-Nazzjonalisti Għawdxin tilfu kull fiduċja fih, anke jekk kienu appoġġjawh għall-kap. Fil-PN, Bernard Grech ġab biss firda u tifrik.