Ta’ Repubblika b’ħalqhom magħluq dwar l-iżvilupp massiċċ propost ta’ vilel fuq Kemmuna

Diġa’ kellna artiklu fuq dan is-sit taħt it-titlu ta’: “Ta’ Repubblika b’ħalqhom magħluq dwar il-vilel fuq Kemmuna”. U għadna sal-lum ma smajna xejn minn għand Repubblika dwar dan il-proġett massiċċ li qed isir fuq il-gżira ta’ Kemmuna. Il-MaltaToday għada kif infurmat li kien hemm l-approvazzjoni tal-assessjar finali fuq l-iżvilupp ġewwa l-bajja ta’ San Niklaw u l-bajja ta’ Santa Marija fuq Kemmuna mill-ERA (The Environment and Resources Authority). Ta’ min wieħed jirrimarka li min-naħa tal-iżviluppaturi kien hemm xi tibdiliet fuq id-disenji tal-proġett, li kienu mitluba mill-awtoritajiet. Issa dan l-iżvilupp għandu jersaq quddiem l-Awtorita’ tal-Ippjanar għall-approvazzjoni tagħha.

Għal darba oħra wieħed jistaqsi fejnhom il-pampaluni ta’ Repubblika biex jikkritikaw jew jitolbu biex dan l-iżvilupp ma jsirx. Kif intqal fl-artiklu preċedenti fuq dan is-suġġett, ta’ Repubblika ma qalu xejn fuq dan il-bini ta’ vilel lussużi biex jinxtraw mis-sinjuri. U għal darba oħra nerġgħu nistaqsu, għaliex ta’ Repubblika reġgħu waqgħu fil-muta fuq dan il-proġett? Possibbli mhux qed jagħtihom fastidju li qed isir bini ta’ vilel biex jinxtraw mis-sinjuruni?

Għal darba oħra nistqarru li ta’ Repubblika jikkritikaw skond min ikun l-iżviluppatur. F’dan il-każ nafu li dan mhu ħadd ħlief Melo Hili li għadhom kemm xtraw il-binja tat-Times ġewwa Triq San Pawl fil-Belt, bieb ma bieb mal-Berġa ta’ Kastilja, biex jiżviluppawha f’appartamenti lussużi wkoll.

Jista’ jkun li Repubblika jibqgħu lura milli jikkritikaw dan il-proġett ta’ Kemmuna u anke tat-Times fil-Belt, għax l-iżviluppatur jagħti donazzjonijiet lil Repubblika, Occupy Justice u Civil Society Network? S’issa għadna lanqas rajna ebda kumment mill-medja indipendenti tal-Knisja fuq din l-aħħar storja. L-anqas The Times għadha ma tkellmet. Il-mod kif the Malta Today tkellmet fuq dan il-proġett, penġitu qiesu l-iżviluppatur qed jagħmel b’pjaċir lill-ambjent għaliex naqqas l-extent tal-iżvilupp.

Huwa tal-iskantament kif ta’ Repubblika jużaw ‘two weights and two measures’. Meta jridu jikkritikaw u jippruvaw ikissru l-proġett li jaqa’ għall-attenzjoni tagħhom u meta jaqblilhom, għal raġunijiet mhux għalkemm tifhimhom, jibqgħu f’ħalqhom magħluq.

Inħeġġuhom biex ma jagħmlux preferenzi u jikkritikaw fejn ikun hemm il-bżonn u mhux joqgħodu jħarsu lejn l-ismijiet tal-iżviluppaturi.