Dwejjaq kbar fost ħafna Laburisti ġenwieni: Jason Micallef jgħid li ma kellux x’jaqsam tat-tkeċċija ta’ Manwel Cuschieri

It-Tlieta li għadda, l-eks-deputat Nazzjonalista, Mario Galea mar fuq il-programm ta’ Saviour Balzan biex jgħid li l-Partit Nazzjonalista spiċċa jwarrab lin-nies tiegħu stess. Fis-sewwa, illum fil-PN hemm nies li huma kapaċi u għandhom il-gazz li jitkellmu.

Imma huwa ċar li fil-Partit Laburista qed jiġri l-istess. Il-każ ta’ Manwel Cuschieri li twaqqaf milli jkompli bil-programm tiegħu fuq ix-xandir tal-Partit Laburista qed jitqies minn ħafna Laburisti bħala azzjoni vendikattiva kontra tiegħu. Infakkar li Manwel Cuschieri kien dejjem hemm wara l-Partit Laburista fiż-żmien tajjeb jew ħażin ta’ dan il-partit. Dejjem kien hemm. Dan wassal biex issa ġie kkreat kurrent kontra l-istess Robert Abela.

Il-fatt li Manuel Cuschieri spiċċa jittrasmetti il-programm li kellu fuq is-social media – għaliex ma jistax jagħmlu aktar fuq il-mezzi tal-Partit Laburista – juri l-ingratitudini kbira lejn Manwel Cuschieri. Imma tidher li r-raġuni tinsab fil-fatt li hemm biża fil-fazzjoni ta’ Robert Abela li Joseph Muscat jagħmel comeback politiku u jisfidah fil-kariga ta’ kap tal-partit. Jekk dan is-seħħ – dan hu l-biża’ – Cuschieri żgur ikun fil-kap ta’ Muscat.

Imma dak li għaddej minnu Manuel Cuschieri huwa biss waħda mill-ingratitudnijiet mill-Partit Laburista lejn Laburisti oħra li nafu biha. Hemm ħafna oħrajn li qed isoffru ingratitudnijiet fis-silenzju. Hemm nies li taw kontribut kbir fil-Partit Laburista, speċjalment meta kien fl-Oppożizzjoni u llum twarrbu. B’hekk dan il-kamp ta’ nies imweġġgħin qiegħed jikber. Dan qed iwassal biex jikber is-sentiment ta’ dwejjaq fil-Partit Laburista. Hemm dwejjaq kbir fost ħafna Laburisti għaliex qed iħossuhom mhux smati.

Id-differenza bejn il-Lejber u l-PN tinsab hawn. Fil-Lejber hemm aktar il-kapaċita’ li jżommu dan id-dwejjaq ġewwa fihom. Dan ġej mill-fatt li qiegħed fil-gvern waqt li l-PN qiegħed fl-Oppożizzjoni allura huwa aktar faċli li jkun hemm kritika fil-beraħ. Imma wieħed għandu jibqa’ żgur li dan id-dwejjaq li hemm illum fil-Partit Laburista għad narawh ħiereġ fil-beraħ ukoll.

Tant kemm dan hu minnu li Jason Micallef, li jmexxi l-One, ħareġ stqarrija li ġiet mitqiesha bħala dikjarazzjoni ta’ gwerra kontra l-kamp ta’ Robert Abela. Micallef jagħmilha ċara li hu ma kellu xejn x’jaqsam bħala kap tal-istazzjoni One mad-deċiżżjoni li l-programm ta’ Manuel Cuschieri jitwaqqaf. Micallef jgħidha ċara, li din kienet deċiżjoni meħuda mill-Partit Laburista. Fi kliem ieħor, kienet deċiżjoni li ħa Robert Abela nnifsu.