L-istorbju fil-Belt: konferma li l-ebda deputat min-naħa tal-gvern li hu mid-distrett ma fetaħ ħalqu llum fil-Parlament

Kif antiċipa dan is-sit, l-ebda deputat min-naħa tal-Gvern li tela’ fuq l-ewwel distett ma tkellem illum fil-Parlament fuq il-legal notice li għadda l-gvern biex il-mużika tibqa’ sas-siegħa ta’ filgħodu. Dan għaliex hemm rabja kbira fost ir-residenti lejn id-deputati Laburisti minħabba li qed iħossuhom ittraduti.

Dan il-fatt ikompli jkabbar ir-responsabilita’ tal-Oppożizzjoni u ta’ Bernard Grech. L-Oppożizzjoni trid terfa’ r-responsabilita’ ta’ dawn il-fatti. Għaliex qed ngħid dan? L-Oppożizzjoni wriet li ma hiex attiva fuq il-kwistjoni tal-mużika fil-Belt u missha għamlet ħafna iżjed ħoss, speċjalment meta l-Partit Laburista għalaq ħalq ir-rappreżentanti tiegħu tal-ewwel distrett u mhux qed iħallihom jitkellmu.

Imma le, l-Oppożizzjoni aljenata u mhix moħħha hemm. Għadhom ħsiebhom wisq fuq id-disgwid intern. Minflok ma Bernard Grech jara kif jiġbed lil kulħadd lejh, qed ikabbar l-għadab tad-deputati tiegħu stess u jkompli jżid il-firda. U dan mhux tajjeb għal pajjiżna. B’hekk l-Oppożizzjoni mhux qed tkun proattiva. Wasalna f’sitwazzjoni fejn il-Gvern jista’ jiżbalja kemm irid għax jaf li l-votant mhux ser iħares in-naħa l-oħra, għax l-Oppożizzjoni hija maħkuma wisq minn firdiet, diżorganizzazzjoni u apatija li qed jikkawża Bernard Grech. L-elettorat jista’ jirrabja kemm irid għad-deputati tal-Gvern għaliex mhux qed isib l-Oppożizzjoni warajh.

Il-Prim Ministru u l-grupp tiegħu jafu li l-Partit fl-Oppożzjoni ma hu qed jibgħat ebda sinjal li bih jista’ jattira l-attenzjoni tal-elettorat u aktar agħar mhu qed jibgħat ebda messaġġ ta’ fiduċja, inkluż meta jkun hemm rabja fost ir-residenti bħal ma rajna li ġara fil-Belt Valletta.

Bernard Grech ma jistax jippriedka l-għaqda meta l-anqas kapaċi jġib miegħu residenti rrabbjati u anki nies fis-settur tat-turiżmu li mhux qed jaqblu ma din id-deċiżjoni.  Forsi għax is-sajf u s-sħana qed tagħmel tagħha, imma mhux sewwa li l-media indipendenti qed issib diffikulta biex tistaqsi mistoqsijiet lill-Ministri tal-Gvern, lill-Prim Ministru u anke lill-Oppożizzjoni għax donnu kulħadd sparixxa u ħadd ma jrid jgħid xejn.