Fid-dibattitu tal-abort, Joseph Muscat qed jiżloq fin-niexef

Joseph Muscat ġie rrappurtat mill-Lovin Malta fejn qal li l-istat ma għandux jindaħal fuq l-abort imma din hi deċiżjoni tal-mara jew aħjar biex inkun eżatt ma’ kliemu, din hija deċiżjoni tal-omm. Mhux ser nidħol fl-argument tal-abort fih innifsu, biss dan l-argument iwaqqa’ dak kollu li kien jgħid Muscat dwar l-ugwaljanza. Fejnha l-uġwaljanza bejn l-irġiel u n-nisa?

Ejja għal mument naqblu fuq l-abort. Mela skont dan l-argument, meta niġu għall-abort ma hemmx ugwaljanza għaliex il-mara jew l-omm trid tagħżel. U mbagħad x’ser jiġri mir-raġel jew il-missier? Dan ma għandux dritt għall-opinjoni tiegħu?

L-argument f’dan il-qasam hu li l-mara qed tkun użatha bħala inkubatur meta ma tkunx qed tingħata d-dritt tal-abort. Dan hu argument qadim ħafna li nsibuh diskuss fil-medju-evu meta kienet qed tkun ifformulata t-teorija teoloġika tal-Immakulata Kunċizzjoni. L-argument kien jekk il-Madonna kienetx “vas” jiġifieri kontenitur meta ġarret lil Kristu f’ġufha meta skont San Luqa dan sar mingħajr intervent ta’ raġel. Illum qed naraw l-istess argumenti medjovali jintużaw fid-dibattitu tal-abort. Ara hemm ma ngħidux li morna għall-argument li hu qadim daqs il-brodu! Illum dawn l-argumenti kollha jirriflettu r-relattiviżmu ta’ żmienna, dak li George Orwell sejjaħ bħala doublespeak.

Imma hemm aktar marbut ma’ dan l-argument minn doublespeak, jiġifieri lingwaġġ ambigwu u jinbidel skont il-bżonn. Dan għaliex Joseph Muscat għamel it-tieni argument li hu aktar perikoluż mill-ewwel wieħed. Muscat qal li l-istat ma għandux jindaħal fuq il-kwistjoni tal-abort. Din hija materja li tmiss biss l-omm. Jekk wieħed jaċċetta dan l-argument ta’ Joseph Muscat li l-istat ma għandux jindaħal fuq l-issue tal-abort, mela l-istat l-anqas għandu jindaħal fuq issues oħra. L-istat illum jindaħal lill-ġenituri x’jiġu mgħallma it-tfal tagħhom fl-iskejjel. L-istat jindaħal lill-ġenituri li jridu bilfors jibgħatu t-tfal tagħhom l-iskola. L-istat jindaħal jekk xi ġenitur imur sesswalment ma’ uliedu li huma taħt l-eta’. Jekk l-istat ma jindaħalx fuq materja tat-tqala l-anqas għandu jindaħal fuq materji oħra. Argument bħal dan minn Muscat iwassal biss għall-anarkija.

Ma nistgħux ngħidu li l-istat ma għandu jindaħal lil ħadd x’jagħmel jew x’jiddeċidi f’materji ta’ sesswalita’? Fuq kollox jekk l-istat ma jistax jiddeċidi fuq materji marbuta mas-sess, l-anqas għandu jiddeċiedi fuq materji oħra. Sa mill-bidu tat-tnissil tal-istat, l-istat ma jistax ikun selettiv, fejn jindaħal u fejn le.

Jien kont wieħed mill-ftit kritiċi tal-gvern ta’ Muscat bejn 2013 u 2017 minħabba appuntu din is-selettivita’ li daħħlet lil Malta fil-ħajt. Mhux ta’ b’xejn li taħt it-tmexxija ta’ Joseph Muscat, inħolqot f’Malta atmosfera ta’ impunita li wasslet biex pajjiżna daħal fil-lista l-griża u mhux ta’ b’xejn li din l-attitudni ta’ Joseph Muscat wasslet għat-tmiem tiegħu qabel iż-żmien mill-politika.

Dan hu riżultat ta’ selettiżmu politiku.

Din hija xi ħaġa li anki l-Laburisti ġenwini, fil-fond ta’ qalbhom jammettu. U dan il-ħsieb imur oltre mid-dibattitu fuq l-abort! Fuq dan il-punt Joseph Muscat żelaq fin-niexef.