X’tfisser din il-ħatra tal-Aġent president

Lil Frank Bezzina nafu l-universita’. Qatt ma tkellimna biss nafu bħala professur tal-affari tiegħu. Qed ngħid dan għaliex dak li ser inkun qed ngħid mhux bi kritika kontra tiegħu imma biex wieħed jifhem eżattament x’ġara f’din l-għażla tiegħu bħala Aġent President.

Jekk wieħed isegwi eżattament l-istorja tal-presidenza, wieħed isib – u din hija xi ħaġa pubblika, li f’mument minnhom, Eddie Fenech Adami kien ikkontempla li jagħmel lil Olivier Friggieri President. Olivier Friggieri kien bniedem ta’ statura Nazzjonali u kien mitqies qrib il-Partit Nazzjonalista. Imma l-punt hawn qiegħed li għall-ewwel darba kellna akkademiku li qed jissemma’ għall-presidenza imma li mhux politiku. Mela Eddie Fenech Adami ried jagħmel president persuna li hija qrib il-partit Nazzjonalista imma li mhix politika. Din il-proposta għolliet l-istatura tal-presidenza.

Issa ġara li Robert Abela ppropona akkademiku u wassal biex qiegħdu għall-post ta’ aġent president. Sa hawn din tista’ tidher bħala tkomplija ta’ dak li kien beda Fenech Adami. Imma dan mhux il-każ. Il-problema mhux fl-għażla tal-persuna imma fil-mod kif saret il-prosposta. Normalment il-president jintgħażel mill-gvern. Naf li issa ser ikun hemm emendi għal dan. Imma l-aħħar president intgħażel mill-gvern u l-għażla sabet l-appoġġ tal-Partit Nazzjonalista. Imma jibqa’ li Ġorġ Vella ġej mill-kamp Laburista. Mela l-għażla tal-aġent president kienet qed tiġi mill-kamp tal-Oppożizzjoni. Din id-darba dan inkiser għaliex il-gvern għażel aġent president li ġej mill-kamp tiegħu stess.

Fuq kollox f’din għażla, l-istess gvern ta daqqa ta’ ħarta lill-proposta ta’ Joseph Muscat li ħareġ jgħid li fil-presidenza għandu jkun hemm alternanza tas-sessi jiġifieri darba jkollna president raġel u darba oħra mara. Għall-inqas meta kien hemm Dolores Cristina, l-aġent president kienet mara. Issa l-għażla tal-aġent president saret mill-gvern u dan il-gvern li jiftaħar tant li hu progressiv u gvern tal-ugwaljanza pprefera raġel flok mara b’hekk fl-għola istituzzjoni spiċċajna b’żewġ irgiel minn gvern li hu progressiv!

Imma hemm aktar f’din l-istorja minn hekk. Hemm minn qed jargumenta li l-gvern poġġa lil Frank Bezzina biex jinqeda bih għal meta jkollu bżonn. Kulħadd jaf fejn qiegħed mal-President tal-lum, Dr George Vella. Il-Gvern jaf li jekk iressaq quddiemu xi liġi li tmur kontra l-valuri tiegħu ma jiffirmahiex. Allura tpoġġa xi ħadd biex jekk ma jiffirmax Dr Vella jiffirma hu meta jkun jinzerta fuq it-tron?

Issa hawn jinsab l-iżball tal-oppożizzjoni. Waqt li nifhem li wieħed jibgħat ittra uffiċjali, nifhem ukoll li jekk ma ssirx tweġiba, xorta din ma tiġġustifikax l-għażla. Il-gvern żgur jaf li Dr. Bernard Grech għandu storja warajh, bħala avukat fil-qorti li ma jiktibx it-tweġibiet f’isem il-klijenti tiegħu fil-ħin jew qatt ma jwieġeb. Jidher li l-gvern rikeb fuq dan il-fatt u sallab lil Dr Bernard Grech u miegħu ssallbet l-oppożizzjoni.

Żgur li din tmur mal-ħafna nuqqasijiet li sa issa sirna nafu bihom magħmula mill-Partit Nazzjonalista. Ma aħniex ngħidu li għaddew ġurnata jew tnejn u forsi ma kienx hemm ċans ta’ diskussjoni nterna jew neċessarja. Hawn kienu għaddew tliet ġimgħat u Bernard Grech baqa’ ma wieġibx. Dan qed juri li l-prim ministru qed jibqa’ għaddej fuq l-oppożizzjoni u din l-oppożizzjoni aktar ser tkun qed tisfaxxa mal-medda taż-żmien.