Alex Perici Calascione ser jippreżenta n-nomina għall-viċi kap illum fil-11.30: Bernard Grech ma kien jaf xejn b’din id-deċiżjoni.

Dan is-sit jinsab infurmat li Alex Perici Calascione ser ikun qed jippreżenta n-nomina għall-viċi-kap illum fl-11.30 am. L-aħbar li Alex Perici Calascione interessat fin-nomina ta’ viċi-kap tatha l-Malta Today ilbieraħ. Dak li ma ntqalx hu li Alex Perici Calascione ma nfurmax lil Bernard Grech bl-interess tiegħu f’din in-nomina. Bernard Grech u s-Segretarju Ġenerali Michael Piccinino saru jafu mingħand terzi bl-interess ta’ Alex Perici Calascone f’din il-kariga.

Wieħed irid jiftakar li Perici Calascione kien wieħed minn dawk li ħadmu biex jitwarrab Adrian Delia u jieħu l-poter f’idejh Bernard Grech. Biss wara li Bernard Grech ħa t-tmexxija tal-Partit Nazzjonalista f’idejh, beda bil-mod iwarrab lil Alex Perici Calascione.

Jidher ċar li din hija mossa tal-establishment biex ikomplu jsaħħu l-poter tagħhom fil-Partit Nazzjonalista.

Infakkar li għal din il-kariga ssemma Mark Anthony Sammut imma mbagħad wara li Bernard Grech wera li riedu, Mark Anthony Sammut qallu le. Ried viċi-kap mara. Issemmiet Janice Chetcuti. Imma jidher li issa ma għadhiex interessata. Issemmiet ukoll Graziella Galea. Biss jidher li mhux ser toħroġ dan għaliex l-establishment ser ikun qed jilgħab il-logħba qadima tiegħu, fi kliem ieħor, iqiegħed hemm kandidat tiegħu u b’hekk il-viċi-kap ikunu għażluh huma. Dan ifisser ukoll li qed jgħidu lil David Agius biex ma jitfax in-nomina għal viċi-kap.

B’hekk Bernard Grech ma għandu l-ebda say f’din l-għażla u ser ikun jidher ċar li Alex Perici Calascione ser ikun qed itellaq waħdu. Dan ifisser li Bernard Grech ma għandu l-ebda kontroll fil-Partit Nazzjonalista. Kif jgħid il-Malti, il-ħmar tiegħu imma qiegħed jirkeb wara.