Karol Aquilina u David Casa kisru l-kodiċi ta’ Etika tal-PN. Ser jieħu passi kontra tagħhom Bernard Grech?

Bernard Grech illum huwa persuna maqbuda kif jgħidu bl-Ingliż ‘between a rock and a hard place’.

Wara li Joe Giglio għamel il-kummenti tiegħu fuq ir-radio, żewġ deputati tal-Partit Nazzjonalista ħarġu jattakkawh. Mela għandna żewġ deputati tal-PN li qed jattakkaw deputat ieħor tal-PN. Dan l-attakk minn dawn iż-żewġ deputati tal-PN beda wara li Joe Giglio għamel kumment fuq Efimova li ma hix deputata u sa fejn naf jien l-anqas membru tal-PN. Mela Joe Giglio ma attakka l-ebda deputat Nazzjonalista. Imma wara dan il-kumment, Karol Aquilina u David Casa ħarġu jattakkaw lill-kollega u deputat bħalhom Joe Giglio.

Mela għandna naqblu li Giglio ma attakka lil ħadd fil-Partit Nazzjonalista. Il-kummenti tiegħu kienu jikkonċernaw lil Efimova biss u qal li għandu l-provi ta’ dak li qed jgħid. Għamel ukoll differenza bejn il-Partit Nazzjonalista u l-NGO Repubblika.

Imma l-punt li jolqot lill-PN jinsab hawn. Ftit tax-xhur ilu, Dr Grech kien għamel emfasi kbira, meta kien hemm il-kwistjoni bejn Dr Delia u Dr Azzopardi, li deputat ma għandux jattakka deputat ieħor. Issa f’din l-istorja għandu żewġ deputati, Karol Aquilina u David Casa, li attakkaw lil Dr Giglio mingħajr riserva. Dan huwa ksur tal-kodiċi tal-etika tal-Partit Nazzjonalista. X’ser jagħmel issa Bernard Grech?

Karol Aquilina u David Casa marru kontra kliemu u sfidawh. Dawn ġew jaqgħu u jqumu mill-etika li suppost iħaddnu bħala deputati f’isem il-Partit Nazzjonalista. X’passi ser jieħu Bernard Grech? Ser juża d-dixxiplina fuq dawn iż-żewġ deputati tal-partit tiegħu stess? Ser jitlob biex il-Kummissjoni ta’ Etika u Dixxiplina tinvestigawhom?

Ħaġa oħra li jrid jikkonsidra u jistaqsi dwarha lin-nies tiegħu Bernard Grech tittratta l-lealta’. Fejn hi l-lealta’ ta’ Aquilina u Casa f’dan ir-rigward? Lejn min huma leali dawn iż-żewġ deputati? Lejn il-Partit Nazzjonalista jew lejn l-NGO Repubblika? Dawn huma mistoqsijiet li bil-fors irid jistaqsi lid-deputati tiegħu Bernard Grech għax hawn daħlu dubji serji fejn hi qiegħda l-lealta’ tagħhom.

Hemm ukoll l-kumment tal-eks-segretarju tal-Partit Nazzjonalista fejn talab lil Bernard Grech biex jikkundanna l-kummenti ta’ Giglio. X’ser jagħmel Bernard Grech? Ser jikkundanna lil Joe Giglio u jimxi kif qallu ta’ Repubblika anki jekk dawn it-tnejn kissru l-kodiċi ta’ etika tal-PN? Għax biex jikkundanna dak li qal Joe Giglio jkun qed jaġevola lil NGO Repubblika u jikkonferma li d-deputati ta’ Repubblika fil-Partit Nazzjonalista jistgħu jattakkaw deputati oħra fl-istess partit.

Fuq kollox Joe Giglio fil-kummenti tiegħu qabeż għall-Partit Nazzjonalista u għamel diviżjoni skjetta bejn Repubblika u l-Partit Nazzjonalista. Imma hawn għandna storja fejn minħabba ċertu kummenti reġgħet infetħet ferita li ser twassalna għal iktar diviżżjoni fi ħdan il-Partit Nazzjonalista.

Il-poplu xeba’ jisma li Dr Bernard Grech irid u ser idaħħal id-dixxiplina. Issa huwa ċ-ċans ta’ Dr Grech biex juri fejn u kif ser juża din l-imbierka dixxiplina. Hawn għandu ċans tajjeb li jiddixxiplina lil min attakka deputat bħalu, lil min uża kliem goff meta ndirizza deputat fil-grupp parlamentari tiegħu, biex jikkundannaw avukat li kien ta s-servizzi tiegħu lil wieħed mill-klienti xi snin ilu, li gidbu lill-kap tagħhom li ilu jiftaħar li għandu grupp parlamentari magħqud u kollha qed jaħdmu għalenija.

Ġiet l-okkażżjoni idonea għal Bernard Grech biex juri sninu. Ġie l-mument fejn il-Kap tal-Partit Nazzjonalista jgħaddi mill-paroli għall-fatti. Wasal iż-żmien li Dr Bernard Grech jaġixxi u mhux ipaċpaċ biss. Huwa ż-żmien propizju biex in-Nazzjonalisti u mhumiex jaraw verament x’jiswa l-kap tal-Partit Nazzjonalista.