Il-każ ta’ Iosif Galea: għaliex kellu jkun arrestat eżatt meta kien qed isiefer ma’ eks-Prim Ministru Malti u mhux qabel?

Minn qarrej ta’ dan il-blog

L-aħbar prinċipali tal-lum kienet li ċertu Iosif Galea ġie arrest fl-Italja waqt li kien qiegħed hemm għal żjara ma’ grupp li fih kien hemm ukoll Joseph Muscat, l-eks-Prim Ministru Malti. Storja bħal din iġġib ħafna mistoqsijiet.

L-ewwel waħda dwar il-ħbieb li kellu u għandu Joseph Muscat. Mhux ta’ unur għal eks-Prim Ministru Malti li jkun fuq żjara barra l-pajjiż ma’ grupp u wieħed mill-grupp jiġi arrestat għaliex hemm mandat ta’ arrest internazzjonali. Wieħed jistaqsi allura l-pulizija qatt ma avżat lil Joseph Muscat biex joqgħod attent ma’ min ikollu x’jaqsam?

Imbagħad hemm it-tieni fatt li din il-persuna hemm kontra tagħha mandat internazzjonali ta’ arrest. Dan kien ilu li ħareġ sena u nofs. Kif il-pulizija Maltija, taħt Gafa’, li ġie onorat minn stat barrani għall-ħidma tiegħu kontra l-kriminalita’ qatt ma ħaseb biex jarrestah? Ma nemminx li ma kienx jaf b’dan il-mandat internazzjonali mill-Ġermanja. Normalment, meta jiġri hekk għaliex ikun hemm xi ħadd x’imkien, forsi f’Malta jew anki barra, li jkollu interess li ma jinfurzax il-mandat ta’ arrest internazzjonali.

Imbagħad hemm it-tielet fattur. Insiru nafu li dan kemm-il darba ħareġ minn Malta. Possibbli, issa l-awtoritajiet Taljan ħasbu biex jarrestawh, waqt li kien fi żjara ma’ eks-Prim Ministru Malti. Din hija stramba ħafna. Għaliex ma arrestawhx qabel, meta ħareġ minn pajjiżna?

Hu x’inhu il-każ, f’din l-istorja naqbel ma’ dak li kiteb David Casa.

Kif il-Pulizija Maltija qatt ma arrestatu jekk kellu mandat ta’ arrest mill-Ġermanija, pajjiż tal-EU?  Min verament kien qed jagħmel il-bsaten fir-roti biex l-arrest ma jsirx? Kienu l-forzi Maltin jew dawk Tedeski li ma kellhomx interess jinfurzaw dan il-mandat internazzjonali?

Possibli li s-Sur Iosif Galea ma kienx jaf b’dan il mandat? Jekk kien jaf, kif azzarda isiefer barra mill-pajjiż, meta suppost jaf li jekk, kif jasal fl-arrivals ta’ kull pajjiż tal-EU ser jeħel żgur għaliex l-iskrutinju xorta jsir b’mod partikolari meta wieħed jiġi biex joħroġ mill-pajjiż? Nafu li dan siefer aktar minn darba.

B’liema arja ta’ “untouchable” u tant ħaseb li kien “untouchable” u ma hux se jiġi arrestat li saħansitra siefer mal-eks-Prim Ministru Malti!

La siefer kemm-il darba, ġie skrutinat żgur mid-Departures tal-MIA. Possibbli qatt ma ġie “highlighted” mis-sistema tal-kontroll tal-Boarding?!

Xi ħadd mill-Awtoritajiet irid jirrispondi. Kieku qegħdin ngħixu ġo pajjiż normali, kieku ġa rriżenja xi ħadd jew aktar minn wieħed!

Sliem.