Roberta Metsola tibgħat messaġġi kontrastanti dwar il-pożizzjoni tagħha fuq l-abort f’dokumentarju li għadu kif sar dwar Malta

Kummentarju minn Dr Hermann Farrugia

In-Newsportal France24 għadu kif xandar dokumentarju dettaljat dwar is-sitwazzjoni politika u soċjologika tal-gżejjer Maltin. Parti sostanzjali ta’ dan ir-rappurtaġġ kien jikkonsisti f’Intervista diretta ma’ Dr. Roberta Metsola fil-kariga tagħha ta’ President tal-Parlament Ewropew liema rwol prestiġġjuż ġiet eletta għalih permezz ta’ vot qawwi mid-deputati Ewropej. Fi kliem ieħor, anki jekk hija kienet ġejja minn wieħed mill-iżgħar stati tal-Ewropa – li finalment dan huwa s-suġġett ta’ dan id-dokumentarju – xorta kienet kapaċi tokkupa kariga daqshekk għolja.

Il-ġurnalista politika u tal-kronaka Caroline de Camaret għoġobha tintroduċi lil Roberta Metsola bħala politiku mara ta’ stoffa, kuraġġjuża u determinata. Hija ġiet xprunata mill-grupp tal-Partiti Popolari Ewropej (E.P.P.) għal din l-ogħla kariga. Iżda bħala preambolu ġenerali għad-dokumentarju, ġie aċċennat mal-ewwel li hija ta’ prinċipju u li tħaddan il-valur tal-ħajja umana u distintivament għandha l-konvinzjoni personali tagħha kontra l-abort.

Saħansitra ġie emfasizzat li l-pożizzjoni tagħha hija konsonanti mal-fehma attwali tal-maġġoranza tal-poplu Malti u li sewwasew jaqblu magħha kemm il-Partit Laburista fil-Gvern kif ukoll l-Oppożizzjoni Nazzjonalista li Metsola hija membru tiegħu. Iżda paradossalment, il-bużillis intlaħaq ftit minuti wara fil-punt ta’ dak li jista’ jitqies li jikkostitwixxi l-qofol ta’ dan id-dokumentarju.

Meta ġiet mistoqsija dwar il-pożizzjoni personali tagħha kontra t-terminazzjoni volontarja tal-gravidanza (tqala), Dr Metsola dlonk irreagixxiet immedjatament b’mod li kien jidher li dil-kwestjoni kienet ippreparata sew għaliha u għalhekk it-tweġiba kienet ćara u ta’ bla ekwivoku. Roberta Metsola nsistiet li bħala President tal-Parlament Ewropew hija tat garanzija li sejra tappoġġja kull riżultat ta’ vot li jiggwida deċiżjoni jew rakkomandazzjoni magħmula mill-Parlament Ewropew rigward dil-materja.

Bħalma diġa’ kien ġie nnutat minn analisti politici lokali ftit wara l-ħatra ta’ Metsola, wara li kienet iltaqgħet formalment mal-President Emmanuel Macron (li bħalissa qed jokkupa ukoll il-Presidenza tal-Kunsill Ewropew), hija wriet ċar li kienet ser tappoġġa l-pożizzjoni ta’ Macron fuq l-abort. Il-pożizzjoni uffiċċjali ta’ Roberta Metsola tagħti lok għal sitwazzjoni ta’ nuqqas ta’ konsistenza mal-viżjoni politika kif espressa minnha stess fit-tħaddin ta’ kif iddikkjarat li tħares lejn il-valuri tal-ħajja fil-bidu ta’ din l-intervista, kemm dawk personali, ma’ dawk imħaddan mill-istess Partit li tiegħu hija membru. Wieħed kien jistenna li Roberta Metsola tuża din l-intervista biex tibgħat sinjal ta’ sostenn għall-‘Missjoni u Viżjoni’ tal-Partit Politiku tagħha. Infakkar li finalment hija ġiet eletta minn ħdanu. Marbuta mal-konsistenza personali, hemm marbuta wkoll il-kredibilita’ politika,

Jiena nemmen li tkun x’tkun ir-rwol jew kariga ta’ responsabilita’ li wieħed / waħda, ikun / tkun, ġie / ġiet fdata fih, partikolarment jekk bħal f’dan il-każ, din il-kariga tkun dejjem għal terminu qsajjar u definit, jgħodd il-maxim eżistenzjali li insibuh fi kliem Kristu stess. Kristu jeżiġi li ‘Wieħed ma jistax jaqdi kemm ‘l Alla u fl-istess ħin lix-xitan’. Għalhekk jien nemmen li l-pożizzjoni personali għandha tkun marbuta mal-viżżjoni politika. Jiena nemmen li Metsola għandha tkun is-sinjal ta’ sostenn għall-‘Missjoni u Viżjoni’ tal-Partit Politiku tagħha stess. Infakkar li hija oriġinjament ġiet eletta minn ħdanu u finalment trid terġa tirritorna fi ħdanu biex tkompli bil-missjoni politika tagħha. Għalhekk nemmen fil-konsistenza personali, għaliex hija din il-konsistenza li twassal għall-kredibilita’ politika.

U tabilħaqq dan għandu japplika aktar f’ambitu ta’ dikjarazzjoni f’intervista bħal din. Il-messaġġ kien kontradittorju. B’hekk messaġġi opposti ġew mgħoddija fl-istess nifs u fl-istess dokumentarju. F’dan il-każ, il-konklużjoni li reġgħet spikkat f’dan id-dokumentarju hija perċiż bħall-intenzjoni li kienet u għadha tesprimi l-unika kandidata Nazzjonalista li ddikkjarat fil-pubbliku li hija radikalment pro-abort.