Ittra miftuħa għal Dr Bernard Grech minn tesserat tal-Partit Nazzjonalista.

Għaziz Bernard,

Ippermettili nindirizzak b’ismek imma dejjem b’rispett lejk. Bħala tesserat fil-Partit Nazzjonalista inħoss li huwa dmir u dritt tiegħi li nesprimi opinjoni fuq il-futur tal-istess partit. Nemmen lit-tesserati għandhom dmir li jesprimu lilhom infushom u jiġu mismugħa kif inhu xieraq. Nemmen li bħala kap ta’ partit politiku fl-oppożizzjoni u forza politika b’saħħitha f’pajjiżna, wara it-telfa kbira li l-partit ġarrab, kellu jkollok l-umilta’ u d-diċenza politika li tassumi ir-responsabilta’ tat-telfa elettorali, mhux biss, imma li l-maturita’ politika titlob ukoll li wara il-proċess ta’ kompożiżżjoni tal-grupp parlamentari Nazzjonalista, titfa’ ir-riżenja tiegħek b’mod immedjat. Dan biex kull min jemmen li għandu l-potenzjal ta’ mexxej jkun liberu u mingħajr xkiel li jpoġġi ismu fuq il-lista għall-elezzjoni ta’ kap tal-partit.

B’dispjaċir ngħid li bi strateġija maħsubha minn qabel ir-riżultat preliminari u mhux dak uffiċjali, l-istazzjon Nazzjonalista Net TV bil-kollaborażżjoni ta’ eks-diriġenti tal-partit immanipulaw l-imħuħ tat-telespettaturi biex jippreparawhom għal dak li ġej, jiġifieri, il-wasla tiegħek fis-sala tal-voti u id-dikjarazzjoni tiegħek li tibqa’ tmexxi l-partit. Dan m’hu xejn ħlief dittatura deċiża min-numru żgħir ta’ persuni li, sfortunatament, għal darba oħra qed jimmanipulaw u xxeklu id-drittijiet ta’ dawk kollha li afdaw il-vot tagħhom fl-istess partit. Dan meta il-Partit Nazzjonalista, suppost, huwa msejjes fuq id-demokrazija u l-ġustizzja. M’hemmx li nitgħallmu minn dak li l-partit ġarrab fl-istorja riċenti tiegħu stess.

Fl-aħħar imma mhux l-inqas, hemm bżonn kbir li l-Partit Nazzjonalista verament, mhux bil-kliem imma bil-fatti “walk the talk” u jirrispetta bis-serjeta’ lill-elettorat Malti kollu kemm fl-atteġġjament tiegħu u tas-sosstenituri tiegħu. Infakkrek ukoll, li kull partit politiku rebbieħ, jkollu bżonn il-fiduċja ta’ kull Malti u Maltija ta’ rieda tajba, jkunx Nazzjonalist minn ġuf ommu, Laburist ġenwin jew dawk kollha li m’għandhomx rabta ma’ partit politiku.

Rigward id-dixxiplina, filwaqt li naqbel mad-dixxiplina inġenerali marbuta ma’ kull struttura eżistenti, ma naqbel xejn mal-atteġġjament arroganti u anti-demokratiku fid-dikjarazzjoni tiegħek għal dawk kollha li jesprimu b’mod kostruttiv u passjoni fil-media soċjali.

Kap umli u lejali lejn soċjetà demokratika ma jiddikjarax dawn it-tip ta’ diskorsi. Nifhem li ħadt fit-tul fl-ittra tiegħi. Nittama biss li jirbaħ is-sens komun u tagħmel l-aħjar għażla tajba għall-Partit Nazzjonalista u għal Malta.

Grazzi u tislijiet,

Membru tesserat fil-Partit Nazzjonalista