Grazzi għal Rosianne Cutajar, il-Lejber ma kellux straġi fuq fis-sitt distrett: imma xorta ser tibqa’ bla ministeru
James Debono kiteb artiklu llum għall-Malta Today fejn fih qal li l-Lejber naqqas fuq kull distrett, minbarra fuq Għawdex u fuq Ħal Qormi. Analiżi interessanti. Jien mhux ser nikkummenta fuq Għawdex għax dan jistħoqqlu analiżi dettaljata. Imma llum ser niffoka biss fuq dak li qal dwar Ħal Qormi.
Debono ma jsemmix lil Rosianne Cutajar b’isimha. Dak li hu żgur li kien grazzi għal Rosianne Cutajar li l-Lejber ma ġarrabx straġi fuq dan id-distrett bħal ma ġarrab fuq distretti oħra Laburisti fosthom, it-tieni, it-tielet u r-raba’ distrett. Kieku l-Lejber sema’ minn ta’ Repubblika u ma ħalliex lil Rosianne Cutajar toħroġ, ibqgħu żguri li dan id-distrett kien ikollu l-istess trend li kellhom distretti oħra, magħrufa bħala Laburisti – minbarra Għawdex – fejn il-Lejber naqqas il-popolarita’ tiegħu. Fuq it-tieni, it-tielet u r-raba’ distrett, il-Lejber naqqas aktar mill-PN il-popolarita’ tiegħu.
Infakkar li Rosianne Cutajar ġabet 2,158 vot bħala l-ewwel preferenza. Infakkar li Rosianne Cutajar hija l-aktar mara li ġabet unijiet fil-Partit Laburista wara Miriam Dalli. Imbagħad nisa oħra, li fl-ewwel count ġabu ħafna inqas minnha unijiet, spiċċaw ministri jew segretarji parlamentari.
Kif irrimarka tajjeb Ranier Fsadni, f’artiklu li kiteb għal The Shift, Rosianne Cutajar ma telatx minħabba d-donkey voting għaliex kien hemm kandidat, Malcolm Agius Galea, li ħa vantaġġ tal-liġi li għaddejna biex raġel ikun jista’ jieħu kunjom il-mara u spiċċa li ġie fuq nett tal-lista. Martu kunjomha Agius. B’hekk ħafna tawh preferenza għax kien l-ewwel fuq il-lista tal-kandidati Laburisti. Kif irrimarka tajjeb Fsadni, fil-każ ta’ Cutajar, din il-liġi spiċċat biex ħadmet kontra tagħha. Fi kliem ieħor għaddejna liġi biex suppost tagħti support lill-mara u spiċċat biex ħadmet bil-kontra għaliex minħabba fiha, mara ma għamlithiex għall-Parlament fl-elezzjoni li għaddiet!
B’hekk Agius Galea spiċċa wieħed minn ta’ l-aħħar li waqa’. Hu waqa’ qabel Rosianne Cutajar. Meta waqa’, il-voti tiegħu għaddew għand Ian Borg u mhux għand Rosianne Cutajar, għax Borg qiegħed qabel Cutajar minħabba kunjomu. B’hekk tela’ Ian Borg u mhux Rosianne Cutajar. L-argument ta’ Ranier Fsadni huwa korrett: il-voti ta’ Agius Galea għaddew għand Borg u mhux Cutajar minħabba d-donkey voting.
Wisq probabbli li Rosianne Cutajar l-anqas titla’ bil-by-election għaliex Cutajar ser tibda minn żero – peress li hija ma għaddiet l-ebda vot lil Ian Borg għaliex baqgħet imdendla, waqt li Agius Galea ser jibda b’845 vot. Dawn huma il-voti li Malcolm Agius Galea ta lil Ian Borg. Peress li din il-by-election ser issir skont il-voti li ġab Ian Borg, dawn il-voti kollha li Agius Galea ta lil Ian Borg ser jerġa’ jieħodhom lura waqt l-għadd tal-voti f’din il-by-election.
Min-naħa tagħha, Rosianne Cutajar tefgħet post fuq Facebook fejn qalet li tefgħet in-nomina tagħha għal din il-by-election. Fil-messaġġ fuq Facebook kitbet hekk:
Anki jekk kienet il-persuna li salvat lill-Lejber milli jkollu tnaqqis fuq is-sitt distrett, kif kellu fuq id-distretti kollha Maltin, xorta waħda mhux ser tikkwalifika biex tingħata ministeru. Imma dik hija l-ironija tal-politika. L-uniku konsolament li jista’ jkollha, li ser titla’ bil-vot tan-nisa!
Min-naħa tiegħu, il-Lejber irid joqgħod attent għaliex fl-elezzjoni li jmiss ser ikompli jnaqqas u mhux iżid. Min-naħa tiegħi, qed insemmi dawn id-dettalji biex nuri kemm għamlu analiżi ħażina ta’ Repubblika meta attakkaw, f’isem il-Partit Nazzjonalista, lil Rosianne Cutajar. Bl-attakki tagħhom spiċċaw jgħinu lill-Lejber u mhux idgħajfuh. Kieku ma kienx għall-voti li kisbet Cutajar, kieku l-Lejber naqqas fuq dan id-distrett kif naqqas fuq id-distretti l-oħra, inkluż fuq dak li ħareġ fuqhom il-Prim Ministru u d-deputat Prim Ministru Chris Fearne.
Jidher ċar li hemm ħafna Laburisti mweġġgħin. Dawn ma kienux ser joħorġu jivvutaw imma ħarġu jivvutaw xorta waħda b’solidarjeta’ ma’ Rosianne Cutajar minħabba l-attakki li saru fuqha mill-grupp Repubblika u s-segwaċi ta’ Daphne Caruana Galizia!