Tinbeda t-triq biex Bernard Grech jibqa’ kap: David Casa jmexxi l-ħrafa li Bernard Grech naqqas id-disfatta elettorali

David Casa għadu kemm qal fuq Net TV li t-telfa setgħet kienet akbar! F’dan is-sit diġa’ tkellimt dwar il-ħrafa li ħareġ biha Bernard Grech meta qal li naqqas id-distakk minn 80 elf vot differenza. Dan id-distakk qatt ma kien jeżisti taħt Adrian Delia. Issa din il-ħrafa qed imexxiha David Casa. David Casa kien wieħed minn dawk li ħadem biex itajru lil Adrian Delia. Illum David Casa spiċċa jiddefendi lilu infusu bl-istess mod ta’ Bernard Grech.

Ieħor minn tal-klikka tar-ribelli li qed jibgħat dan il-messaġġ fuq il-mezzi tax-xandir huwa Trevor Degiorgio. Fuq il-PBS, Trevor Degiorgio qal li Bernard Grech għandu jingħata ċans jaħdem qabel jirriżenja. Inkredibbli! Dan wieħed minn dawk li kien ħadem bla heda kontra Adrian Delia u kien wieħed minn dawk li ħeġġeġ lin-Nazzjonalisti biex itajru lil Adrian Delia.

Ma tantx hu diffiċli li tifhem kif il-klikka tar-ribelli użaw argumenti ftit xhur ilu biex itajjru lill-Kap ta’ dak iż-żmien u issa qed jużaw l-istess argumenti biex jiddefendi lill- Kap li poġġew huma. Infakkar li dawn neħħew lil Adrian Delia wara survey tal-Misco li kien qal li ġejja telfa kbira għall-Partit Nazzjonalista. Issa din it-telfa ġiet. Ġiet taħt Bernard Grech. Għallinqas, Adrian Delia kellu d-diċenza jgħid li jekk jitlef kien ser jirreżenja minn kap. Bernard Grech tilef bil-kbir. Qabel l-anqas ġie ikkonfermat fil-Parlament ħareġ jgħid li ser jibqa’ u l-akkolti ta’ madwaru ħarġu jitkellmu bl-istess mod.

Dawn ma jistgħux jagħmlu mod ieħor għax jekk ma jagħmlux hekk ikollhom jammettu li kienu żbaljati għal kollox u huma parti minn dan id-disastru fil-Partit Nazzjonalista.